Presidenti Nishani i akordon familjes Qiriazi, themeluese të VUSH, medaljen presidenciale “Nderi i Kombit’.
Më dt. 11. 07. 2017 në mjediset e Presidencës së Republikës së Shqipërisë, në prani të familjarëve e studiuesve si dhe drejtuesve ungjillorë në Shqipëri, në një ceremoni rasti, Presidenti i Republikës së Shqipërisë Z. Bujar Nishani i akordoi çmimin “Nderi i Kombit” pas vdekjes, familjes që themeloi më 14 nëntor 1892 Vëllazërinë Ungjillore të Shqipërisë, vëllezërve Gjerasim e Gjergj Qiriazi, motrave Sevasti e Parashqevi, si dhe dhëndrit të kësaj familjeje, Z. Kristo Dako.
Familja Qiriazi ka shërbyer si një pishtar që besnikërisht, përmes ndikimit të Ungjillit, ka reflektuar dritën e dijes në kombin shqiptar përgjatë periudhës së Rilindjes. Kjo familje ka qenë simbol i përhapjes së dijes e kulturës, qytetarisë dhe trashëgimisë së vlerave autoktone shqiptare. Jemi plot gëzim të dëshmojmë vlerësimin kombëtar që i akordohet familjes, themeluese të VUSH.
Në dekretin nr. 10565 jepet motivacioni i Presidentit, si vijon:
“Për kontributin e shquar intelektual dhe atdhetar brenda dhe jashtë trojeve shqiptare për rilindjen, zhvillimin dhe mabrëvajtjen e arsimit tonë kombëtar. Për organizimin dhe pjesëmarrjen aktive në Kongresin e Manastirit, ngritjen e institucionit të parë arsimor femëror, shkollës së vashave”Qiriazi”, krijimin e shoqatave atdhetare-kulturore shqiptare, botimin e Abetares së Parë, periodikëve arsimorë dhe librave historikë”.
